Навагрудак рыхтуецца адзначыць сваё 975-годдзе

 Навагрудак рыхтуецца адзначыць сваё 975-годдзе. Святочныя мерапрыемствы з нагоды знамянальнай даты пройдуць у горадзе 5 і 6 кастрычніка. Чым будзе здзіўляць горад, якімі мерапрыемствамі і праектамі парадуе гасцей, што за сюрпрызы чакаюць кожнага, хто далучыцца да ўрачыстасцей, расказала намеснік старшыні Навагрудскага райвыканкама Святлана Каралько.

Сёлетні год для нашага горада багаты на знакавыя падзеі і юбілеі. Разам з усёй краінай мы будзем адзначаць 75-годдзе вызвалення Беларусі ад нямецка-фашысцкіх захопнікаў і 75 год  утварэння Гро­дзенскай вобласці. 8 ліпеня споўніцца 75 гадоў з дня вызвалення горада ад нямецка-фашысцкіх захопнікаў, а ў кастрычніку Навагрудак урачыста адзначыць 975-годдзе першага летапіснага ўзгадвання. З нагоды гэтых дат запланавана правядзенне шматлікіх мерапрыемстваў рознай накіраванасці, падрыхтоўка да якіх ужо пачалася. У студзені адбылося ўрачыстае адкрыццё года, прысвечанага 975-годдзю Навагрудка, на якім быў дадзены старт юбілейным мерапрыемствам.

Ад тэатралізацыі да  вогненнага шоу

– Святкаванне 975-годдзя Навагрудка будзе яркім і маштабным, урачыстасць збярэ гасцей з розных рэгіёнаў вобласці і краіны, прыедуць да нас і замежныя госці, – адзначыла Святлана Мікалаеўна. – Праграма распрацавана такім чынам, каб кожны атрымаў як мага больш пазітыўных уражанняў, знайшоў для сябе нешта цікавае і запамінальнае. Свята разгорнецца на 12 тэматычных пляцоўках. Цэнтрам падзей стане плошча Леніна, дзе будуць праходзіць асноўныя мерапрыемствы. Адкрые свята тэатралізаваны пралог, які падораць гледачам артысты Беларускага дзяржаўнага акадэмічнага музычнага тэатра. У другой палове дня гасцей чакае плац-парад духавых аркестраў «Фанфары над Навагрудкам» і канцэрт узорна-паказальнага аркестра Узброеных Сіл Рэспублікі Беларусь, а таксама разнастайная канцэртная праграма. Свае музычныя падарункі прывя­зуць на свята калектывы гарадоў-пабрацімаў Навагрудка з Польшчы, Літвы, Расіі. А ўвечары на цэнтральнай сцэне выступяць зоркі беларускай эстрады – ансамбль «Песняры», група «Тяни-Толкай», арт-група «Беларусы», Пётр Ялфімаў і іншыя. Яркім момантам вячэрняй праграмы ста­нуць вогненна-піратэхнічнае шоу з хадулістамі і святочны феерверк.

«Навагрудскі Манмартр» і фестываль нацыянальных культур

На пляцоўцы каля Малога замку ўпершыню на Навагрудчыне пройдзе фестываль нацыянальных культур «Шматнацыянальная Навагрудчына. Сэрцы, якія гучаць ва ўнісон», на якім сваю культуру і традыцыі прадставяць нацыянальныя дыяспары рэгіёну. А тэрыторыя каля помніка Адаму Міцкевічу стане месцам, дзе можна будзе ўбачыць работы мастакоў з усёй рэспублікі. Тут пройдзе вернісаж «Навагрудскі Манмартр».

Пляцоўка каля гістарычна-краязнаўчага музея ператворыцца ў фотагалерэю пад адкрытым небам, якая раскажа пра гісторыю горада, адлюстраваную ў фотаздымках з гарадскога архіва і  асабістых архіваў гараджан. Пройдзе тут і дэфіле «Час праходзіць –  мода застаецца», на якім навучэнцы ўстаноў  адукацыі прадэманструюць касцюмы з элементамі навагрудскага строю.

Вяселле караля Ягайлы і Соф’і Гальшанскай

Адной з самых відовішчных стане інтэрактыўная пляцоўка «Навагрудскі замак», якая размесціцца ў чашы замка. Тут пройдуць конныя і пешыя рыцарскія баі, майстар-класы па сярэднявечных танцах і стральбе з лука, выступяць вулічныя артысты і размесцяцца рады рамеснікаў. Кульмінацыяй арт-праекта «Навагрудскі замак» стане рэканструкцыя вянчання ў Фарным касцёле і вяселля караля Ягайлы і Соф’і Гальшанскай, якое адбылося ў 1422 годзе. З сярэдзіны красавіка на спецыяльна створаным сайце можна будзе даведацца больш падрабязна пра работу пляцоўкі «Навагрудскі замак» і пазнаёміцца з інтэрактыўнай картай найбольш цікавых момантаў. Наведванне пляцоўкі плануецца зрабіць платным. Аднак кошт бу­дзе даступным, напрыклад, для ўсёй сям’і можна будзе набыць агульны білет. Прычым, для зручнасці гасцей зрабіць гэта можна будзе загадзя праз інтэрнэт. Рыцарская тэматыка будзе гучаць і на гістарычнай пляцоўцы каля «Уязной брамы». Падчас святочных мерапрыемстваў прой­дзе ўрачыстае адкрыццё памятнага знака «Уязная брама», дзе з’явіцца амаль трохметровая фігура рыцара.

На любы густ і ўзрост

Прыхільнікі мастацкага слова змогуць прыняць удзел у літаратурна-музейным праекце «Літаратурны Алімп Навагрудчыны» Дома-музея А. Міцкевіча. Таксама госці змо­гуць завітаць на арт-пляцоўку каля раённай бібліятэкі «Правінцыйныя замалёўкі», прымерыць вобразы гістарычных персанажаў у фотазоне «Застылая гісторыя», адправіцца ў віртуальную гістарычна-літаратурную экспедыцыю «Навагрудчына на карце свету» або прыемна правесці час у бібліякафэ «Гістарычная кніга».

Гарадскі парк па традыцыі стане галоўнай тэрыторыяй дзяцінства, дзе будзе працаваць дзіцячая пляцоўка, пройдзе тэматычная квэст-гульня. У цэнтры ўвагі тут будуць і людзі сталага ўзросту – для іх рыхтуецца культурна-забаўляльная праграма «Мой горад – мой лёс».

А аматары спорту змогуць паспрабаваць стаць рэкардсменамі на спартыўнай пляцоўцы «Кніга рэкордаў Навагрудчыны». Конкурсы і спартыўныя спаборніцтвы, паказальныя выступленні з майстар-класамі ад вядомых спартсменаў Навагрудчыны –  актыўны і цікавы адпачынак чакае кожнага.

Разам з грамадскімі аб’яднаннямі

Актыўны ўдзел у вялікім святкаванні 975-годдзя прымуць і грамадскія аб’яднанні раёна і вобласці. Моладзі, напрыклад, яшчэ загаддзя прапануюць паўдзельнічаць у конкурсе на лепшы фотаздымак любімага горада. Фотаработы-пераможцы і прызёры стануць удзельнікамі тэматычнай выстаўкі ГА «БРСМ» на адной са святочных пляцовак.

Актывісты маладзёжнай арганізацыі сумесна з раённай арганізацыяй Беларускага саюза жанчын, РА РГА «Белая Русь» 5 кастрычніка ўручаць памятныя медалі і падарункі маладым мамам, якія народзяць дзетак напярэдадні знакавай даты. Наведаюць пажылых жыхароў раёна ў аддзяленнях сястрынскага догляду ў бальніцах. Упрыгожаннем свята стане абласны конкурс паветраных змеяў, які арганізуе раённая арганізацыя ГА «БРСМ». А для членаў пярвічных прафсаюзных арганізацый будуць арганізаваны велапрабегі па асноўных месцах турыстычнай прывабнасці Навагрудка.

Святочная інфраструктура

Трэба адзначыць, што праграма ўрачыстасцей будзе дапоўнена, а значыць свята падорыць яго гасцям і ўдзельнікам яшчэ некалькі прыемных сюрпрызаў. Разам з тым аргкамітэт, прадпрыемствы і арганізацыі раёна, грамадскія аб’яднанні ўжо вядуць актыўную падрыхтоўку да мерапрыемстваў. Чакаецца, што ў святочныя дні горад наведае вялікая колькасць гасцей, і су­с­трэць іх трэба на належным узроўні. Запланаваны мерапрыемствы па добраўпарадкаванні вуліц і грамадскіх месц, падрыхтоўцы аб’ектаў грамадскага харчавання, гасцініц і хостэлаў, арганізацыі работы аб’ектаў гандлю. У хуткім часе на дарогах Р-5, Р-11 і Р-64 будзе размешчаны дзясятак інфармацыйных указальнікаў шляху да Навагрудскага замка. Юбілейныя банеры з’явяцца на вуліцах горада і абласнога цэнтра, а на пэўных відах прадукцыі навагрудскіх прадпрыемстваў будзе размешчаны лагатып свята. Шырокае інфармаванне і анансіраванне святочных мерапрыемстваў прадугледжана ў мясцовых, абласных і рэспубліканскіх сродках масавай інфармацыі.

Алена Ганцэвіч, «НЖ»